ពិធីបើកការដ្ឋានសាងសង់ជាផ្លូវការធ្វើឡើង ក្រោមវត្តមានលោក កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់។

លោក ខូយ រីដា អភិបាលនៃគណៈអភិបាលខេត្តពោធិ៍សាត់ប្រាប់កម្ពុជាថ្មី នៅថ្ងៃទី ១៨ ខែកញ្ញា ឆ្នាំ ២០២៤ នេះថា វត្តមានរោងចក្រទី២ របស់ក្រុមហ៊ុន  Minebea នៅលើទឹកដីខេត្តពោធិ៍សាត់ នឹងជួយបង្កើតការងារបន្ថែមជូនប្រជាពលរដ្ឋឱ្យទទួលបានចំណូលបន្ថែម។

កន្លងមក លោក​ កែវ​ រតនៈ​ រដ្ឋមន្រ្តីក្រសួងរ៉ែ​ និងថាមពលបានលើកឡើងថា រោងចក្រនេះបានដក​ប្រតិបត្តិការ​មួយចំនួនចេញពីប្រទេសសិង្ហបុរីមកម្ពុជា ដោយសម្លឹងឃើញសក្ដានុពល ការគាំទ្រថា​មពលអគ្គិសនី ខណៈកម្ពុជាកំពុងផលិតថាមពលអគ្គិសនីករកើត​ឡើងវិញ​ច្រើនលើសលប់ ដែលមាន​ភាព​ការទាក់ទាញ។

លោក​ កែវ​ រតនៈ បញ្ជាក់ថា ថាមពលកកើតឡើងវិញ ដែលជាថាមពលចេញពីពន្លឺព្រះអាទិត្យ នឹងក្លាយជាជន្ទល់ធ្វើឱ្យរោងចក្រដំណើរការនៅកម្ពុជា។

សូមជំរាបថា ក្រុមហ៊ុន Minebea Mitsumi បានបើកដំណើរការអាជីវកម្ម​របស់ខ្លួនដំបូង​នៅ​កម្ពុជា កាលពី​ឆ្នាំ២០១១ វិនិយោគ​លើមុខសញ្ញាផលិតម៉ូទ័រខ្នាតតូច ម៉ូទ័រកង្ហារ គ្រឿងបំណែក​ម៉ាស៊ីន ឧបករណ៍អុបទិចសម្រាប់ទូរសព្ទ ប៊ិកអេឡិច​ត្រូនិក ឧបករណ៍រំញ័រសម្រាប់ហ្គេមកុំព្យូទ័រ គ្រឿងបង្គុំ​សៀគ្វីអេឡិចត្រូនិក ផ្ទាំងបញ្ចេញពន្លឺ LED ឧបករណ៍វាស់ជាតិស្ករក្នុងឈាម និងប្រព័ន្ធ​អំពូលភ្លើងសាធារណៈឆ្លាតវៃ។

បច្ចុប្បន្នក្រុមហ៊ុន Minebea នៅរាជធានីភ្នំពេញ កំពុងផ្ដល់ឱកាស​ការងារជូនប្រជាពលរដ្ឋជិត ៧ ពាន់នាក់។ ហើយរោងចក្រថ្មីនេះ នឹងបង្កើតការងារបានប្រមាណ ៨ ពាន់កន្លែងបន្ថែមទៀត៕