ក្រសួង​ការងារ បាន​ជូនដំណឹង​ដល់​សាធារណជន ជាពិសេស​ពលករ​ខ្មែរ​ដែល​កំពុង​ស្នាក់នៅ និង​ធ្វើការ​នៅ​ប្រទេស​ថៃ ជ្រាប​ថា យោង​ស្មារតី​ព្រមព្រៀង​រួម​រវាង​រាជរដ្ឋាភិបាល នៃ​ព្រះរាជាណាចក្រ​កម្ពុជា និង​រាជរដ្ឋាភិបាល នៃ​ព្រះរាជាណាចក្រ​ថៃឡង់​ដ៍ ក្នុង​ដំណើរ​ទស្សនកិច្ច​ផ្លូវការ​របស់ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា កាលពី​ថ្ងៃទី ៧ ខែកុម្ភៈ ឆ្នាំ ២០២៤ នៅ​ព្រះរាជាណាចក្រ​ថៃឡង់​ដ៍​ , យោង​ជំនួប​ទ្វេភាគី លោក​រដ្ឋមន្ត្រី​ក្រសួង​ការងារ និង បណ្ដុះបណ្ដាល​វិជ្ជាជីវៈ ជាមួយ​លោក​រដ្ឋមន្ត្រី​ក្រសួង​ការងារ នៃ​ព្រះរាជាណាចក្រ​ថៃឡង់​ដ៍ អំឡុង​ពេល​ចូលរួម​កិច្ចប្រជុំ​រដ្ឋមន្ត្រី​ការងារ​អាស៊ាន​លើក​ទី ២៨ (ALMM) នៅ​ប្រទេស​សិង្ហបុរី កាលពី​ថ្ងៃទី ៣០ ខែតុលា ឆ្នាំ ២០២៤ និង ជំនួប​ទ្វេភាគី​រដ្ឋមន្ត្រីការបរទេស​កម្ពុជា​-​ថៃ ក្នុង​ឱកាស​ចូលរួម​វេទិកា​អនាគត​អាស៊ាន​លើក​ទី ២ នៅ​ទីក្រុង​ហាណូយ សាធារណរដ្ឋ​សង្គមនិយម​វៀតណាម កាលពី​ថ្ងៃទី ២៥ ខែកុម្ភៈ ឆ្នាំ ២០២៥ រាជរដ្ឋាភិបាល នៃ​ព្រះរាជាណាចក្រ​ថៃឡង់​ដ៍ បាន​ឯកភាព​តាម​សំណើ​របស់​ក្រសួង​ការងារ​ថៃ លើកលែង​តម្លៃ​សេវា​ការអនុញ្ញាត​ចេញ​-​ចូល​ប្រទេស​ថៃ (Re-Entry Permit) ដល់​ពលករ​ខ្មែរ ឡាវ និង​ភូមា អំឡុងពេល​បុណ្យចូលឆ្នាំថ្មី ប្រពៃណីជាតិ ចាប់ពី​ថ្ងៃទី​ ១ ខែមេសា ដល់​ថ្ងៃទី​ ១៥ ខែឧសភា ឆ្នាំ​ ២០២៥។

ក្រសួង បាន​បញ្ជាក់​ថា ការលើកលែង​តម្លៃ​សេវា​នេះ គឺ​ផ្តល់ជូន​តែមួយ​ដង​គត់​ដល់​ពលករ​ខ្មែរ​ដែល​មាន​លិខិតឆ្លងដែន​/​លិខិត ធ្វើដំណើរ​ពលករ​កម្ពុជា​ទៅ​ធ្វើការ​នៅ​បរទេស (TD) និង​មាន​ទិដ្ឋាការ​ការងារ (Non-Immigration L-A Visa) ដែលមាន​សុពលភាព​លើសពី​ថ្ងៃទី​ ១៥ ខែឧសភា ឆ្នាំ ២០២៥។ ការ​លើកលែង​នេះ ក៏​បូក​រួម​ទាំង​កូន​ក្រោម​អាយុ ១៨​ ឆ្នាំ ដែល​ទទួល​បាន​ការ​វាយ​ត្រា​ប្រភេទ​អ្នក​ក្នុង​បន្ទុក និង​មាន​លិខិត​អនុញ្ញាត​ឱ្យ​ស្នាក់នៅ​ក្នុងប្រទេស​ថៃ លើស​ថ្ងៃទី ​១៥ ខែឧសភា ឆ្នាំ ២០២៥។ ដើម្បី​ឱ្យ​ការធ្វើដំណើរ​ចេញ​-​ចូល​ប្រទេស​ថៃ​ដោយ​រលូន សូម​ពលករ​ខ្មែរ​ត្រូវ​ធ្វើដំណើរ​ឆ្លងកាត់​តាម​ច្រកទ្វារព្រំដែន​អន្តរជាតិ​កម្ពុជា​-​ថៃ​។ ត្រូវ​វាយ​ត្រា​ចេញ​-​ចូល​ប្រទេស​ថៃ​លើ​លិខិតឆ្លងដែន​/​លិខិត​ធ្វើ​ដំណើរ TD ដែល​មាន​ទិដ្ឋាការ​ការងារ (Non-Immigration L-A Visa) ដោយ​មិនចាំបាច់​បំពេញ​ពាក្យ​ស្នើសុំ និង​បង់​ថ្លៃ​សេវា​ការ​អនុញ្ញាត ចេញ​-​ចូល​ប្រទេស​ថៃ (Re-Entry Permit)​។ ត្រូវធ្វើ​ដំណើរ​ចូល​ប្រទេស​ថៃ​វិញ​យ៉ាង​យូរ​ត្រឹម​ថ្ងៃទី​ ១៥ ខែឧសភា ឆ្នាំ​ ២០២៥។ ករណី​ធ្វើដំណើរ​ចូល​ប្រទេស​ថៃ​វិញ ក្រោយ​ថ្ងៃទី ​១៥ ខែឧសភា ឆ្នាំ​ ២០២៥ ពលករ​ត្រូវ​បំពេញ​ពាក្យ​ស្នើសុំ និង​បង់ថ្លៃ​សេវា​ការអនុញ្ញាត​ចេញ​-​ចូល​ប្រទេស​ថៃ (Re-Entry Permit) មុន​ធ្វើដំណើរ​ចេញពី​ប្រទេស​ថៃ ដោយ​គិត​តម្លៃ​សេវា​ជា​ធម្មតា បើ​មិន​ដូច្នេះ ទិដ្ឋាការ​ការងារ (Non-Immigration L-A Visa) របស់​ពលករ​ខ្មែរ នឹង​អស់​សុពលភាព។

បន្ថែម​លើ​នេះ ក្រសួង​ការងារ ក៏បាន​សហការ​ជាមួយ​អគ្គនាយកដ្ឋាន អន្តោប្រវេសន៍ នៃ​ក្រសួងមហាផ្ទៃ រដ្ឋបាលខេត្ត​ជាប់​ព្រំដែន​កម្ពុជា​-​ថៃ ស្ថាន​ឯកអគ្គរាជទូត​កម្ពុជា​/​អនុព័ន្ធ​ការងារ អម​ស្ថាន​ឯកអគ្គរាជទូត​កម្ពុជា​ប្រចាំ​ព្រះរាជាណាចក្រ​ថៃឡង់​ដ៍ ស្ថាន​អគ្គ​កុងស៊ុល​កម្ពុជា​ប្រចាំខេត្ត​សៈ​កែវ និង អាជ្ញាធរ​ពាក់ព័ន្ធ ដើម្បី​សម្របសម្រួល​ដល់​ពលករ​ខ្មែរ​ដែល​វិល​ត្រឡប់មក​ស្រុកកំណើត អំឡុង​ពេល​បុណ្យចូលឆ្នាំថ្មី​ប្រពៃណីជាតិតាម​ច្រកទ្វារ​អន្តរជាតិ​កម្ពុជា​-​ថៃ។

សម្រាប់​ព័ត៌មាន​បន្ថែម សូម​ទំនាក់ទំនង​មក​ស្ថាន​ឯកអគ្គរាជទូត​/​អនុព័ន្ធ​ការងារ​អម​ស្ថាន​ឯកអគ្គរាជទូត កម្ពុជា​ប្រចាំ​ព្រះរាជាណាចក្រ​ថៃឡង់​ដ៍ តាមរយៈ​ទូរ​សព្ទ​លេខ +៦៦ ៨៣ ៥៤៥ ៧៧៨៨, +៦៦ ៦២ ០៨៩ ៨៩១៨ និង +៦៦ ៩២ ២៩៩ ០១៣៣ ឬ​តាមរយៈ​ប្រព័ន្ធ Hotline របស់​ក្រសួង​ការងារ និង​បណ្តុះបណ្តាល​វិជ្ជាជីវៈ នៃ​ព្រះរាជាណាចក្រ​កម្ពុជា​លេខ “១២៨៦” ឬ “១២៩៧” ឬ​លេខ​ទូរ​សព្ទ ០៩៧ ៩២០ ២០២៣ ឬ​ក្រុម​តេ​ឡេ​ក្រាម “​សម្រាប់ ពលករ​ទេសន្តរប្រវេសន៍​” តាម​តំណ​ភ្ជាប់ https://t.me/KhmerMigrantWorker។

ក្រសួង​ការងារ សូម​ជូនពរ​ដល់​ពលករ​ខ្មែរ​ធ្វើដំណើរ​ប្រកបដោយ​សុវត្ថិភាព​ពី​តំបន់​ផ្សេងៗ នៃ​ប្រទេស​ថៃ​មក​ព្រំដែន​កម្ពុជា និង​ពី​ព្រំដែន​កម្ពុជា​ទៅ​ស្រុកកំណើត៕