ក្រុមប្រឹក្សាជាតិប្រាក់ឈ្នួលអប្បបរមាត្រូវបានបង្កើតនៅក្នុង ឆ្នាំ២០១៩ ដែលមានសមាសភាពមកពីតំណាងកម្មករនិយោជិត និយោជក និងរាជរដ្ឋាភិបាល ដើម្បីសិក្សាស្រាវជ្រាវ ប្រជុំពិភាក្សា និងផ្តល់អនុសាសន៍អំពីប្រាក់ឈ្នួលអប្បបរមា និងអត្ថប្រយោជន៍ផ្សេងៗ ជារៀងរាល់ឆ្នាំ។

ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈលើកឡើងកាលពីខែឧសភា ឆ្នាំ២០២៣ ថា៖ «សម្តេចតេជោ តែងតែផ្តល់ការណែនាំ និងផ្តល់ការបន្ថែមលើការសម្រេចរបស់ក្រុមប្រឹក្សាជាតិប្រាក់ឈ្នួល អប្បបរមាជារៀងរាល់ឆ្នាំ ដោយឆ្នាំខ្លះបន្ថែមចំនួន ៥ដុល្លារអាម៉េរិក និងឆ្នាំខ្លះបន្ថែម ២ដុល្លារអាមេរិក តាមស្ថានភាពសេដ្ឋកិច្ច។ នៅឆ្នាំ១៩៩៧ បងប្អូនកម្មករនិយោជិតមិនបានទទួលប្រាក់អត្ថប្រយោជន៍ផ្សេងៗទេ ប៉ុន្តែបច្ចុប្បន្ន បន្ថែមពីលើប្រាក់ឈ្នួលអប្បបរមា បងប្អូនកម្មករនិយោជិតទទួលបានអត្ថប្រយោជន៍បន្ថែមមួយចំនួនទៀត»។ 

អត្ថប្រយោជន៍បន្ថែមទាំងនោះរួមមាន ប្រាក់រង្វាន់ធ្វើការទៀងទាត់ចំនួន ១០ដុល្លារអាមេរិក,ប្រាក់សោហ៊ុយធ្វើដំណើរនិងស្នាក់នៅចំនួន ៧ដុល្លារអាមេរិក, ប្រាក់រង្វាន់អតីតភាពការងារចំនួនពី ២ដុល្លារ ដល់ ១១ដុល្លារអាមេរិក, ប្រាក់ថ្លៃបាយពេលធ្វើការថែមម៉ោងចំនួន ២ពាន់រៀលក្នុងមួយថ្ងៃ ប្រមាណ ១០ដុល្លារអាមេរិក, ប្រាក់ឈ្នួលធ្វើការបន្ថែមម៉ោងជាមធ្យម ២៦ដុល្លារអាមេរិក។ 

ឯកឧត្តមបណ្ឌិត អ៊ិត សំហេង លើកឡើងថា រួមនឹងអត្ថប្រយោជន៍ផ្សេងៗ កម្មករនិយោជិតអាចទទួលបានពី ២១៧ ទៅ ២៥៩ ដុល្លារអាមេរិក។ បើសរុបប្រាក់ឈ្នួល និងប្រាក់អត្ថប្រយោជន៍បន្ថែមដែលកម្មករនិយោជិតក្នុងវិស័យកាត់ដេរ ទទួលបានប្រមាណ ជា ៣ពាន់លានដុល្លារអាមេរិកក្នុង១ឆ្នាំ។ 

ឯកឧត្តមបណ្ឌិត បន្ថែមថា បើប្រៀបធៀបប្រាក់ឈ្នួលអប្បបរមានៅកម្ពុជាក្នុង ឆ្នាំ២០២៣ នេះ ជាមួយប្រទេសវៀតណាម មានចំនួនពី ១៣៨ដុល្លារអាមេរិក ដល់ ១៩៨ ដុល្លារអាម៉េរិក តាមតំបន់, ប្រទេសស្រីលង្ការ មានចំនួន ៣៦ដុល្លារអាម៉េរិក, ប្រទេសបង់ក្លាដែស មានចំនួន ៧៦ដុល្លារអាម៉េរិក, ប្រទេសឡាវ មានចំនួន ៧១ដុល្លារអាម៉េរិក និងប្រទេសមីយ៉ាន់ម៉ា មានចំនួន ៦៩ដុល្លារអាមេរិក។ 

របាយការណ៍ក្រសួងការងារឆ្នាំ២០២២​ បានបង្ហាញថា ប្រាក់ឈ្នួលអប្បបរមាសម្រាប់វិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូបត្រូវបានដំឡើងជាបន្តបន្ទាប់ ទោះបីជាទទួលរងផលប៉ះពាល់ពីការរីករាលដាលនៃជំងឺកូវីដ ១៩។ ប្រាក់ឈ្នួលអប្បរមារបស់ប្រទេសកម្ពុជាបានបន្តកើនឡើង ខណៈប្រាក់ឈ្នួលអប្បបរមារបស់បណ្តាប្រទេសប្រកួតប្រជែងរបស់កម្ពុជាបានបន្តធ្លាក់ចុះដោយសារតម្លៃរូបិប័ណ្ណក្នុងស្រុកធ្លាក់ចុះ ធៀបនឹងដុល្លារអាមេរិក។

កាលពីខែធ្នូ ឆ្នាំ២០២២ អគ្គលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមា បានសហការជាមួយអង្គការអន្តរជាតិខាងការងារ (ILO) រៀបចំវគ្គបណ្តុះបណ្តាលស្តីពី «ការរៀបចំ និងការអនុវត្តគោលនយោបាយប្រាក់ឈ្នួលប្រកបដោយប្រសិទ្ធភាព» ដល់មន្រ្តីនៃអគ្គលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមា រយៈពេល៥ថ្ងៃ នៅរាជធានីភ្នំពេញ ដោយមានគ្រូឧទ្ទេសជាអ្នកជំនាញការផ្នែកប្រាក់ឈ្នួលរបស់អង្គការ ILO ចំនួន២នាក់មកពីទីក្រុងបាងកក ប្រទេសថៃ និងហ្សឺណែវ ប្រទេសស្វីស។

សិក្ខាកាមបានសិក្សាពីការប្រើប្រាស់វិធីសាស្ត្រ និងសូចនាករដើម្បីរៀបចំគោលនយោបាយប្រាក់ឈ្នួល ​ទិដ្ឋភាពទូទៅ និងនិន្នាការនៃការកំណត់ប្រាក់ឈ្នួលតាមបណ្តារប្រទេស ព្រមទាំងមានការពិភាក្សាជាក្រុមដើម្បីចែករំលែកចំណេះដឹង និងផ្លាស់ប្តូរបទពិសោធគ្នាទៅវិញទៅមក។ 

កម្មវិធី Better Work (ការងារកាន់តែប្រសើរនៅកម្ពុជា) ដែលជាកម្មវិធីរួមគ្នារវាងអង្គការ ILO និងសាជីវកម្មហិរញ្ញវត្ថុអន្តរជាតិ (IFC) ដែលជាសមាជិកនៃក្រុមធនាគារពិភពលោក (World Bank Group) បានលើកឡើងក្នុងគេហទំព័រថា៖ «ILO លើកកម្ពស់ការកំណត់ប្រាក់ឈ្នួលគ្រប់គ្រាន់ ដែលចាត់ទុកទាំងតម្រូវការរបស់កម្មករ និងក្រុមគ្រួសាររបស់ពួកគេ និងកត្តាសេដ្ឋកិច្ច។ ការកំណត់ប្រាក់ឈ្នួលសមរម្យគឺជាយន្តការដ៏ចាំបាច់មួយដើម្បីអាចឲ្យមានស្តង់ដាររស់នៅសមរម្យ និងប្រាក់ចំណូលសម្រាប់ស្ត្រី និងកម្មករជាបុរស និងក្រុមគ្រួសាររបស់ពួកគេ ហើយជាមួយគ្នានេះផងដែរក៏ធានានូវនិរន្តរភាពរបស់សហគ្រាសដែលបង្កើតការងារសម្រាប់កម្មករផងដែរ»។

ក្រុមប្រឹក្សាជាតិប្រាក់ឈ្នួលអប្បបរមាបានលើកឡើងក្នុងគេហទំព័រថា នៅដើមអាណត្តិទី៥ រាជរដ្ឋាភិបាលកម្ពុជា តាមរយៈក្រសួងការងារបានបន្ថែមការ​យកចិត្តទុក​ដាក់ យ៉ាងខ្លាំងលើបញ្ហាប្រាក់ឈ្នួលអប្បបរមា ដោយ​បាន​​រៀបចំសិក្ខាសាលាត្រីភាគីថ្នាក់ជាតិមួយ ក្រោម​ជំនួយ​បច្ចេកទេសរបស់អង្គការ ILO កាលពីឆ្នាំ២០១៤។ ភាគីពាក់ព័ន្ធ និងគណៈកម្មការប្រឹក្សា​ការងារ​បានទទួលយកនូវគោលការណ៍ចំនួន៥, លក្ខណវិនិច្ឆ័យបែបសង្គមនិងសេដ្ឋកិច្ចចំនួន៧, កាលវិភាគនៃការចរចា, និងការបង្កើតក្រុមការងារបច្ចេកទេសត្រីភាគី។

ក្រុមប្រឹក្សាជាតិប្រាក់ឈ្នួលអប្បបរមាបញ្ជាក់ថា៖ «ជាលទ្ធផលនៃការអនុវត្តតាម យន្តការ គោលការណ៍ លក្ខណវិនិច្ឆ័យ និងកាលវិភាគខាងលើ ប្រាក់ឈ្នួល​អប្បបរមា​​របស់​កម្មករនិយោជិតក្នុងវិស័យវាយនភណ្ឌ កាត់ដេរ និងផលិតស្បែកជើងពីឆ្នាំ២០១៤​ ដល់ ២០២៣ មានការកើនឡើងគួរឱ្យ​កត់​សម្គាល់»។ 

ក្រុមប្រឹក្សានេះលើកឡើងទៀតថា៖ «ជាលទ្ធផល ប្រាក់ឈ្នួលអប្បបរមាសម្រាប់ផ្នែកនេះត្រូវបានបន្តកើនឡើងជាបន្តបន្ទាប់ពី ៤០ដុល្លារអាមេរិក ក្នុង១ខែ នៅឆ្នាំ១៩៩៧ (មុនយន្តការកំណត់ប្រាក់ឈ្នួលអប្បបរមានៅកម្ពុជា) ទៅដល់ ១៤៥ដុល្លារអាមេរិក ក្នុង១ខែ នៅឆ្នាំ២០១៥ (ពេលចាប់ផ្តើមយន្តការកំណត់ប្រាក់ឈ្នួលអប្បបរមានៅកម្ពុជា) និងត្រូវបានដំឡើងដល់ ២០០ដុល្លារអាមេរិក ក្នុង១ខែសម្រាប់ឆ្នាំ២០២៣ និងបន្តរក្សាអត្ថប្រយោជន៍ផ្សេងៗ របស់កម្មករនិយោជិតនៅដដែល»។

លោកស្រី Inguna Dobraja អតីតនាយកប្រចាំប្រទេសនៃធនាគារពិភពលោកនៅកម្ពុជា បានលើកឡើងក្នុងសិក្ខាសាលាផ្សព្វផ្សាយរបាយការណ៍ស្តីពីអនាគតការងារនៅកម្ពុជា កាលពីឆ្នាំ២០១៩ ថា រឿងរ៉ាវជុំវិញវិស័យការងារក្នុង​ប្រទេសកម្ពុជា គឺជាជំពូកដ៏សំខាន់មួយនៅក្នុងដំណើរ​ជោគជ័យផ្នែកសេដ្ឋកិច្ចរបស់ប្រទេសក្នុង​ប៉ុន្មានឆ្នាំកន្លងមកនេះ។

លោកស្រីលើកឡើងថា៖ «អ្នកធ្វើគោលនយោបាយ និងសេដ្ឋវិទូនៅកម្ពុជា និងនៅកន្លែងផ្សេងទៀតទទួលស្គាល់សមិទ្ធផលទាំងឡាយដែលកម្ពុជា​សម្រេច​បាន ជាពិសេស ការសម្រេចបានកំណើនផលិតផលក្នុងស្រុកសរុបមធ្យម៧ភាគរយក្នុង១ឆ្នាំ​ ជាង២ទស​​វត្សរ៍​មកនេះ​ ដែល​ធ្វើ​ឱ្យ​អត្រានៃភាពក្រីក្រធ្លាក់ចុះជាប្រចាំ ប៉ុន្តែគេមិនត្រូវមើល​រំលង​ទេថា ​ការងារគឺជាយន្តការមួយដែលមនុស្សម្នាក់ៗ មើលឃើញអត្ថប្រយោជន៍របស់​វឌ្ឍនភាពនេះ។ ប្រជាជនទទួលបានផលច្រើន ​នៅពេលណាដែលពួកគេសំបូរឱកាសការងារធ្វើ មានប្រាក់ថ្លៃឈ្នួល​និង​ចំណូលកើនឡើង ហើយគុណភាពការងាររបស់ពួកគេកាន់​តែប្រសើរ»។