ប.ស.ស. នឹងចុះបញ្ជីសមាជិក ប.ស.ស. ចល័តនៅគោលដៅធំៗ ចំនួន ៥ រួមមាន រាជធានីភ្នំពេញ ខេត្តបាត់ដំបង ខេត្តកំពង់ចាម ខេត្តតាកែវ និងខេត្តសៀមរាប ដែលមានទីតាំងសរុបចំនួន ២៧ កន្លែង ដើម្បីបង្ខិតសេវាឱ្យកាន់តែកៀកប្រជាពលរដ្ឋ។
គម្រោងចុះបញ្ជីចល័តនេះធ្វើឡើងតាមរយៈកិច្ចព្រមព្រៀងលើគម្រោងស្ដីពីការពង្រីកការចុះបញ្ជីសមាជិក ប.ស.ស. រវាង ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ និងអង្គការអន្តរជាតិខាងការងារ (ILO) ក្រោមជំនួយហិរញ្ញវត្ថុពីសហភាពអឺរ៉ុប (EU)។
លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានឱ្យដឹងថា កិច្ចព្រមព្រៀងនេះគឺជាជំហានបន្តថ្មីមួយ ដែលអាចបង្ខិតសេវារបស់ ប.ស.ស. កាន់តែទូលំទូលាយ និងខិតទៅកាន់តែកៀកប្រជាពលរដ្ឋ ដែលជាក្រុមគោលដៅ ក្នុងនោះរួមមាន ម្ចាស់សហគ្រាស គ្រឹះស្ថានដែលមានកម្មករ-និយោជិត ចាប់ពីម្នាក់ឡើង, បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. អាចចុះបញ្ជី និងទទួលបានប័ណ្ណសមាជិក ប.ស.ស. ភ្លាមៗនៅនឹងកន្លែង។
តាមរយៈគម្រោងនេះ នឹងក្លាយជាយន្តការអនុវត្តយូរអង្វែងទៅមុខទៀតរបស់ ប.ស.ស ព្រោះជាផ្នែកមួយជួយជំរុញឱ្យចំនួនសមាជិក ប.ស.ស. បន្តកើនឡើងជាបន្តបន្ទាប់ ស្របតាមផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ ឆ្នាំ ២០២៤-២០២៨ និងឆ្លើយតបទៅនឹងផែនទីបង្ហាញផ្លូវឆ្ពោះទៅការគ្របដណ្ដប់សុខភាពជាសកលនៅកម្ពុជា ឆ្នាំ ២០២៤-២០៣៥ ដែលដាក់ចេញដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
លោក Koen EVERAERT អនុប្រធានសហប្រតិបត្តិការ នៃប្រតិភូសហភាពអឺរ៉ុបប្រចាំនៅកម្ពុជា បានសម្ដែងក្ដីរីករាយចំពោះការរីកចម្រើន នៃប្រព័ន្ធសន្តិសុខសង្គមកម្ពុជា ព្រមទាំងគម្រោងការពង្រីកការចុះបញ្ជីសមាជិក ប.ស.ស. នាពេលនេះ ជាការផ្ដល់នូវទំនុកចិត្ត និងភាពងាយស្រួលបន្ថែមទៀត ដល់ការធានាបាននូវសុខុមាលភាពរបស់កម្មករ-និយោជិត, បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស។
ជាមួយគ្នានេះ លោកស្រី Xiaoyan QIAN នាយិកា នៃការិយាល័យអង្គការអន្តរជាតិខាងការងារ (ILO) ប្រចាំកម្ពុជា ឡាវ និងថៃ បានឱ្យដឹងដែរថា ប្រទេសកម្ពុជា ជាប្រទេសមួយដែលនាំមុខគេក្នុងចំណោមប្រទេសទាំង ៥ ក្នុងអាស៊ាន ដែលបានចូលរួមអនុវត្តយ៉ាងល្អប្រសើរក្នុងការអនុវត្តរបបសន្តិសុខសង្គម តាមរយៈកិច្ចសហការជាមួយគ្នាក្នុងរយៈពេល ១៦ ឆ្នាំ កន្លងមកនេះ។
លោកស្រី Xiaoyan QIAN ក៏បានអំពាវនាវដល់ ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈកម្ពុជា បន្តពង្រឹងការអនុវត្តប្រព័ន្ធសន្តិសុខសង្គមរបស់ខ្លួន និងពង្រីកការគ្របដណ្ដប់សន្តិសុខសង្គមដល់គ្រប់ប្រជាពលរដ្ឋនៅទូទាំងប្រទេស៕
ដកស្រង់ពី៖
