គិតចាប់ពីខែមករា ដល់ខែសីហា ឆ្នាំ ២០២៤ ការប្រមូលផលស្វាយចន្ទីកម្ពុជាសម្រេចបានប្រមាណ ៨៧ ម៉ឺនតោន ក្នុងនោះនាំចេញទៅវៀតណាមជិត ៨០ ម៉ឺនតោន គិតជាទឹកប្រាក់ប្រមាណ ១ ពាន់ ២ រយលានដុល្លារ។ នេះបើយោងតាមសមាគមស្វាយចន្ទីកម្ពុជា។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ថា នៅថ្ងៃទី ១០ ខែកញ្ញា ឆ្នាំ ២០២៤ នេះថា រយៈពេល ៨ ខែកន្លងមកនេះ ទិន្នផលដែលប្រមូលបានប្រមាណ ៨៧ ម៉ឺនតោន នៃការផលិតទូទៅ ក្នុងនោះនាំចេញទៅវៀតណាមប្រមាណ ៨០ ម៉ឺនតោន ដែលមានទឹកប្រាក់ប្រមាណ ១ ពាន់ ២ រយលានដុល្លារ។
លោក អួន ស៊ីឡុត បានឱ្យដឹងថា៖ «នៅពេលស្វាយចន្ទីធ្លាក់ថ្លៃ នៅចុងខែកុម្ភៈ ឆ្នាំនេះ សមាគមបានប្រកាសឱ្យសមាជិករបស់ខ្លួនចាប់ផ្ដើមហាលគ្រាប់ទុក ដើម្បីកុំឱ្យគាត់លក់ប្រជែងជាមួយកសិករទូទៅ ហើយនៅពេលដែលគាត់ហាលទុក ធ្វើឱ្យលំហូរគ្រាប់ស្រស់ថយចុះរហូតដល់ ៣២% ដែលធ្វើឱ្យតម្លៃគ្រាប់សើមចាប់ផ្ដើមកើនឡើង យើងគិតថា រយៈពេល ១៥ ឆ្នាំនេះ មិនដែលឡើងថ្លៃនៅខែមេសាទេ ប៉ុន្តែដោយសារការរួបរួមគ្នារវាងសមាជិក និងសមាគមក្នុងការមើលទីផ្សារ ការវាយតម្លៃត្រឹមត្រូវ ធ្វើឱ្យកសិករទទួលផល»។
បច្ចុប្បន្នតម្លៃគ្រាប់ស្វាយចន្ទីបានធ្លាក់ចុះបន្តិច ដោយលក់បាន ១៥៧០ ដុល្លារ ក្នុងមួយតោន។
យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីដាំចន្ទីដាំចន្ទី ៧០ ម៉ឺនហិកតា ក្នុងនោះផ្ទៃដីដែលប្រមូលផលចំនួន ៥៨ ម៉ឺន ហិកតា និងជាង ១០ ម៉ឺនហិកតាទៀតជាផ្ទៃដីដាំដុះថ្មី៕
ដកស្រង់ពី៖
