ទីផ្សារសំបកកង់រថយន្តកម្ពុជាគ្រោងនឹងឃើញនូវវឌ្ឍនភាពថ្មីបន្ថែមទៀត ខណៈដែលរោងចក្រផលិតសំបកកង់រថយន្តថ្មីចំនួនពីរដែលមានទុនវិនិយោគសរុបជិត៧០០ លានដុល្លារបានឈានជើងចូលទៅក្នុងទីផ្សារ។ គម្រោងវិនិយោគរោងចក្រផលិតសំបកកង់ទាំងពីរត្រូវបានក្រុមប្រឹក្សាអភិវឌ្ឍន៍កម្ពុជា អនុម័តកាលពីខែសីហា ឆ្នាំ២០២៤។
យោងតាមក្រុមប្រឹក្សាអភិវឌ្ឍន៍កម្ពុជា គម្រោងវិនិយោគនេះ គឺបង្កើតរោងចក្រផលិតសំបកកង់រថយន្ត ដែលមានទីតាំងនៅតំបន់សេដ្ឋកិច្ចពិសេស ស្រុកស្នួល ខេត្តក្រចេះ ដែលមានទុនវិនិយោគចំនួន ៤៣០លានដុល្លារ និងអាចបង្កើតការងារបានជិត ២០០០កន្លែង។
គម្រោងវិនិយោគទី២ គឺបង្កើតរោងចក្រផលិតសំបកកង់រថយន្តនៅតំបន់សេដ្ឋកិច្ចពិសេស ក្រុងបាវិត ខេត្តស្វាយរៀង ដែលមានទុនវិនិយោគចំនួន ២៥៦លានដុល្លារអាមេរិក និងអាចបង្កើតការងារបានចំនួន ១៥០០កន្លែង។
លោក លឹម ហេង អនុប្រធានសភាពាណិជ្ជកម្មកម្ពុជាបានលើកឡើងថា លំហូរនៃការវិនិយោគនេះ ត្រូវបាន រំពឹងថាមិនត្រឹមតែបង្កើតការងារប៉ុណ្ណោះទេ ប៉ុន្តែថែមទាំងរួមចំណែកបង្កើតទីផ្សារសម្រាប់ម្ចាស់ចម្ការកៅស៊ូ និងកសិករ ដែលរហូតមកដល់ពេលនេះពឹងផ្អែកលើការនាំចេញជ័រកៅស៊ូរបស់ពួកគេ។
លោកបានប្រាប់កាសែតខ្មែរថាមស៍ថា «ប្រសិនបើមានតម្រូវការកៅស៊ូពីរោងចក្រកៅស៊ូក្នុងស្រុក វានឹងជួយបង្កើតទីផ្សារក្នុងប្រទេសដល់កសិករ និងម្ចាស់ចម្ការ និងក្រុមហ៊ុនដើម្បីលក់កៅស៊ូឆៅរបស់ពួកគេ»។
លោកបានបន្តថា វានឹងមិនត្រឹមតែបង្កើនចំនួនអ្នកដាំកៅស៊ូប៉ុណ្ណោះទេ ថែមទាំងទាក់ទាញអ្នកវិនិយោគបរទេសបន្ថែមទៀត ឱ្យមកដាំកៅស៊ូនៅកម្ពុជា ដែលអាចពង្រីកផ្ទៃដីបាន។ ផ្ទៃដីចម្ការកៅស៊ូក៏មានការកើនឡើងផងដែរ។
បច្ចុប្បន្នកម្ពុជាមានរោងចក្រផលិតសំបកកង់រថយន្តចំនួនបីដែលកំពុងដំណើរការនៅខេត្តស្វាយរៀង ព្រះសីហនុ និងក្រចេះ។
យោងតាមទិន្នន័យដែលចេញផ្សាយដោយក្រសួងពាណិជ្ជកម្មបានឱ្យដឹងថា កម្ពុជាបាននាំចេញសំបកកង់រថយន្តមានតម្លៃ ៣០៨លានដុល្លារក្នុងរយៈពេល ៥ ខែដំបូងនៃឆ្នាំ ២០២៤ ដែលឆ្លុះបញ្ចាំងពីការកើនឡើងគួរឱ្យកត់សម្គាល់ចំនួន ២០៤ភាគរយបើធៀបនឹងចំនួន ១០១ លានដុល្លារដែលបានកត់ត្រាក្នុងអំឡុងពេលដូចគ្នាកាលពីឆ្នាំមុន។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កម្ពុជាបានដាំដើមកៅស៊ូលើផ្ទៃដីសរុបចំនួន ៤០៧.១៧២ ហិកតា ក្នុងនោះដើមកៅស៊ូនៅលើផ្ទៃដីចំនួន ៣២០.១៨៤ ហិកតា ស្មើនឹង ៧៨.៦ ភាគរយ អាចប្រមូលផលបាន។
របាយការណ៍បានឱ្យដឹងថា ជ័រកៅស៊ូធម្មជាតិជាង ១៧៣.៩១៥ តោនត្រូវបាននាំចេញក្នុងរយៈពេល៧ ខែដំបូងនៃឆ្នាំ២០២៤ កើនឡើង ១.៧២ ភាគរយពី ១៧០.៩៦៨ តោនក្នុងរយៈពេលដូចគ្នាកាលពីឆ្នាំមុន។
កម្ពុជានាំចេញទំនិញកៅស៊ូភាគច្រើនទៅកាន់ប្រទេសម៉ាឡេស៊ី វៀតណាម សិង្ហបុរី និងចិន។