នៅក្នុងសេចក្តីប្រកាសព័ត៌មានកាលពីថ្ងៃពុធក្រុមប្រឹក្សាអភិវឌ្ឍន៍កម្ពុជាបានឲ្យដឹងថា កម្ពុជាបានទាក់ទាញការវិនិយោគទ្រព្យសកម្មថេរចំនួន ៤,៩២ ពាន់លានដុល្លារក្នុងឆ្នាំ២០២៣ កើនឡើង២២ ភាគរយពី ៤,០៣ ពាន់លានដុល្លារកាលពីឆ្នាំមុន។
ប្រភពដដែលបានបន្តថា កម្ពុជាបានអនុម័តគម្រោងវិនិយោគចំនួន២៦៨ កាលពីឆ្នាំមុន ដែលអាចបង្កើតការងារបានប្រហែល ៣០៧.០០០កន្លែង ដោយបន្ថែមថាគម្រោងទាំងនោះផ្តោតសំខាន់លើវិស័យឧស្សាហកម្ម ហេដ្ឋារចនាសម្ព័ន្ធ កសិកម្ម និងកសិឧស្សាហកម្ម និងទេសចរណ៍។
វិនិយោគិនបរទេសកំពូលទាំងបីនៅកម្ពុជាកាលពីឆ្នាំមុន មានដូចជា ប្រទេសចិន សិង្ហបុរី និងម៉ាឡេស៊ី ដោយបន្ថែមថាការវិនិយោគពីប្រទេសចិនមានចំនួន ៦៦ ភាគរយនៃការវិនិយោគសរុប។
រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា លោក ប៉ែន សុវិជាតិ បាននិយាយថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កិច្ចព្រមព្រៀងពាណិជ្ជកម្មសេរីកម្ពុជា-ចិន និងច្បាប់វិនិយោគថ្មីរបស់កម្ពុជាបានទាក់ទាញលំហូរវិនិយោគផ្ទាល់ពីបរទេស។
លោកបានបន្តថា “គំនិតផ្តួចផ្តើមខ្សែក្រវាត់ និងផ្លូវ ក៏បានរួមចំណែកដ៏សំខាន់ក្នុងការទាក់ទាញអ្នកវិនិយោគចិនកាន់តែច្រើនមកកម្ពុជា” ហើយក៏បាននាំមកនូវមូលធន បច្ចេកវិទ្យា និងឱកាសការងារសម្រាប់ប្រជាជនរបស់យើង”។
ដកស្រង់ពី៖ ការងារ២៤
