រាជធានីភ្នំពេញ ៖ វិទ្យាស្ថានពហុបច្ចេកទេសភូមិភាគតេជោសែនស្វាយរៀង បានជ្រើសរើសយកជំនាញចំនួន ១១ ដែលសុទ្ធសឹងតែជាជំនាញមានទីផ្សារការងារខ្ពស់នៅក្នុងខេត្ត និងទទួលបានប្រាក់ចំណូលសមរម្យ ក្នុងការស្វាគមន៍ការបណ្តុះបណ្តាលជំនាញវីជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យដំបូងរបស់ខ្លួននៅថ្ងៃទី ១៥ មករា ឆ្នាំ ២០២៤ ខាងមុខ ។ នេះជាការលើកឡើងរបស់លោក មុត ចន្ថា នាយកវិទ្យាស្ថានពហុបច្ចេកទេសភូមិភាគតេជោសែនស្វាយរៀង ។
បើតាមលោក មុត ចន្ថា ជំនាញទាំង ១១ នោះមានដូចជា ជាងកំបោរ ការងារកំបោរ ការដំឡើងបណ្តាញទឹកក្នុងអាគារ ការដំឡើងអគ្គសនីក្នុងអាគារ ការផ្សារលោហៈដោយធ្នូអគ្គិសនី បរិក្ខាត្រជាក់ក្នុងគេហដ្ឋាន សេវាថែទាំ និងជួសជុលអគ្គសនីរថយន្ត ការដំឡើងបញ្ជាម៉ូទ័រអគ្គិសនី សេវាថែទាំកាមេរ៉ាសុវត្ថិភាព ការផ្សារអគ្គិសនី និងការថែទាំ និងជួសជុលរថយន្ត ។
លោកបន្ថែម ៖ «ដោយឡែកក្នុងចំណោមជំនាញទាំង១១នេះវិទ្យាស្ថានសង្កេតឃើញថា មានជំនាញចំនួន៣ដែលមានសិស្សចុះឈ្មោះរៀនច្រើនជាងគេ ក្នុងនោះមាន ការដំឡើងបណ្តាញអគ្គិសនីក្នុងអាគារ បរិក្ខាត្រជាក់ក្នុងគេហដ្ឋាន និងការថែទាំ និងជួសជុលរថយន្ត» ។
លោកបន្ថែមថា ចាប់តាំងតែពីពេលប្រកាសដាក់ឱ្យអនុវត្តន៍ជាផ្លូវការនូវការបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់នៅថ្ងៃទី ១៤ វិច្ឆិកា ឆ្នាំ២០២៣ វិទ្យាស្ថានជាតិបានទទួលយុវជនមកចុះឈ្មោះចូលរៀនបានចំនួន ៥៤៦ នាក់ ។
លោកបន្ថែមថា សម្រាប់វិទ្យាស្ថានរបស់យើងនឹងបើកឱ្យចូលរៀនដំបូងរបស់ខ្លួននៅថ្ងៃទី ១៥ ខែមករា ឆ្នាំ២០២៤ ខាងមុខនេះ ខណៈវិទ្យាស្ថានបានត្រៀមខ្លួនរួចជាស្រេចលើការបណ្តុះបណ្តាលនៅពាក់កណ្តាលខែនេះ ទាំងគ្រូបង្រៀន បន្ទប់សិក្សាបន្ទប់អនុវត្តន៍ និងសម្ភារៈបច្ចេកទេសផ្សេងៗផងដែរ ។
គូរបញ្ជាក់ផងដែរថាកាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានដាក់ឱ្យអនុវត្តន៍ជាផ្លូវការនូវការបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់គ្រួសារក្រីក្រ និងគ្រួសារងាយរងហានិភ័យ ១,៥ លាននាក់ ដែលការបណ្តុះបណ្តាលនេះមានរយៈពេល ៤ ខែ សិក្សាដោយឥតគិតថ្លៃ ដោយឡែកយុវជនមកពីគ្រួសារក្រីក្រ និងគ្រួសារងាយរងហានិភ័យនឹងទទួលបានប្រាក់ឧបត្ថម្ភប្រចាំខែចំនួន ២៨ ម៉ឺនរៀល រហូតដល់រៀនចប់ផងដែរ ៕
ដកស្រង់ពី៖ ការងារ២៤
