យោងតាមរបាយការណ៍​«ស្ថានភាពស្ថិរភាពហិរញ្ញវត្ថុក្នុងឆ្នាំ២០២៣» ចេញផ្សាយដោយធនាគារជាតិនៃកម្ពុជា(NBC) ​នៅថ្ងៃទី២០ឧសភាកន្លងទៅនេះ លំហូរទុន​វិនិយោគដោយផ្ទាល់ពីបរទេស (FDI) បានបន្តស្ទុះងើបឡើងវិញទៅនឹងនិន្នាការមុនការរាតត្បាតជំងឺកូវីដ១៩ ប៉ុន្តែលំហូរទុននេះគឺ​មិនស្មើគ្នានៅ​តាមវិស័យនិមួយៗឡើយ។ លំហូរ FDI ឈានដល់ ៤ ពាន់លានដុល្លារក្នុងឆ្នាំ ២០២៣ កើនឡើង១០,៦ ភាគរយ និងលើសពីចំនួនមុនពេលជំងឺរាតត្បាតក្នុងឆ្នាំ២០១៩ដែលមានទឹកប្រាក់ទុនវិនិយោគសរុបចំនួន  ៣,៧ពាន់លានដុល្លារ។​

លំហូរទុន FDI ពីប្រទេសចិននៅតែឈរនៅលំដាប់កំពូល។ ប្រទេសចិនមានចំនួនច្រើនជាងពាក់កណ្តាលនៃលំហូរ FDI ក្នុងឆ្នាំ ២០២៣ ជាមួយនឹងការវិនិយោគភាគច្រើនក្នុងវិស័យផលិតកម្ម ហិរញ្ញវត្ថុ សំណង់ អចលនទ្រព្យ និងកន្លែងស្នាក់នៅ។ ប្រទេសអាស៊ីផ្សេងទៀតក៏បានរួមចំណែកដល់លំហូរ FDI រួមមានកូរ៉េខាងត្បូង (១០,២ភាគរយ) ជប៉ុន (៧,៦ភាគរយ) និងសិង្ហបុរី (៦,៦ភាគរយ) ​ ខណៈដែល FDI ពីប្រទេសកាណាដាក៏មានទំហំ (៩,៥ភាគរយ) ផងដែរ។ ប្រទេសទាំងនេះវិនិយោគជាចម្បងលើផ្នែកហិរញ្ញវត្ថុ អចលនទ្រព្យ និងការផលិត។

«ការវិនិយោគផ្ទាល់ពីបរទេសទៅលើវិស័យផលិតកម្មបានកើនឡើងចំនួន៧៦,៤ភាគរយ ​តំណាងឱ្យ ៣៦,៥​ ភាគរយនៃលំហូរ FDI សរុប។ សម្រាប់ការវិនិយោគទៅលើវិស័យឧស្សាហកម្មផលិតកម្មបែបប្រពៃណីដូចជាសម្លៀកបំពាក់ ស្បែកជើង និងវាយនភណ្ឌនៅតែវិស័យដ៏ទាក់ទាញ។ ប៉ុន្តែ​ឧស្សាហកម្ម​ផ្សេង​ទៀត​ក៏​បាន​លេច​ឡើង​ផងដែរ រួម​មាន​ការ​ផលិត​ថាមពល​ពន្លឺ​ព្រះអាទិត្យ ការ​កែច្នៃ​អាហារ និង​សំបក​កង់​រថយន្ត»។ នេះបើយោងតាម NBC។

របាយការណ៍ដដែលក៏បានបង្ហាញទៀតថា ការវិនិយោគផ្ទាល់ពីបរទេសទៅលើវិស័យមិនមែនផលិតកម្មមួយចំនួនក៏បានកត់ត្រាពីកំណើនជាវិជ្ជមានផងដែរ រួមមានសំណង់ (១៧,៤ ភាគរយ) កសិកម្ម (២,៧ ភាគរយ) និងវារីអគ្គិសនី (២០,៣ ភាគរយ)។ ទោះជាយ៉ាងណាក៏ដោយ លំហូរ FDI ទៅកាន់វិស័យមួយចំនួនបានធ្លាក់ចុះ ដូចជាវិស័ហិរញ្ញវត្ថុ (ថយចុះ ១៨,៦ភាគរយ) អចលនទ្រព្យ (ថយចុះ ១១,៨ ភាគរយ) និងកន្លែងស្នាក់នៅ (ថយចុះ១,៦ភាគរយ) ។

លោកស្រីបណ្ឌិត ជា សិរី ទេសភិបាលរបស់NBC ថ្លែងក្នុងសិក្ខាសាលាផ្សព្វផ្សាយស្តីពី«របាយការណ៍ស្ថានភាពស្ថិរភាពហិរញ្ញវត្ថុក្នុងឆ្នាំ២០២៣» នៅថ្ងៃទី២០ឧសភាថា សេដ្ឋកិច្ចកម្ពុជាបន្តងើបឡើង តាំងពីឆ្នាំ២០២៣ ក្នុងអត្រា៥ភាគរយ ជាមួយនឹងកំណើនក្នុងល្បឿនខុសគ្នាតាមវិស័យ ដែលធ្វើឱ្យអត្រាអតិផរណាបានថយចុះមកត្រឹម២,១ភាគរយ ស្របតាមនិន្នាការអតិផរណាក្នុងតំបន់ និងការធ្លាក់ថ្លៃប្រេងនៅលើទីផ្សារអន្តរជាតិ បើទោះបីស្ថានភាពសេដ្ឋកិច្ចក្នុងតំបន់ និងពិភពលោកត្រូវប្រឈមនឹងការកើនឡើងនៃអត្រាការប្រាក់ និងកម្រិតខ្ពស់នៃអត្រាអតិផរណាសកលក៏ដោយ។

លោកស្រីបណ្ឌិតបាន បន្តទៀតថា កំណើនសេដ្ឋកិច្ចកម្ពុជា ត្រូវបានគាំទ្រជាចម្បងដោយការនាំចេញផលិតផលកាត់ដេរ និងមិនមែនកាត់ដេរ ការបន្តងើបឡើងនៃវិស័យទេសចរណ៍និងវិស័យពាក់ព័ន្ធ និងកំណើនរឹងមាំនៃវិស័យដឹកជញ្ជូននិងទូរគមនាគមន៍ខណៈដែលវិស័យកសិកម្មអាចបន្តកើនឡើងយឺត។

លោកស្រីបណ្ឌិតថា៖« ការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីទ្វេភាគី (FTAs) ត្រូវបានរំពឹងថានឹងរួមចំណែក ទាក់ទាញលំហូរវិនិយោគនិងការនាំចេញទៅក្នុងតំបន់បន្ថែមទៀត ដែលនឹងជួយជំរុញផលិតភាពនិងការធ្វើពិពិធកម្មសេដ្ឋកិច្ច»។

លោកស្រីបណ្ឌិត ជា សិរី ទេសភិបាលរបស់NBC ថ្លែងក្នុងសិក្ខាសាលាផ្សព្វផ្សាយស្តីពី«របាយការណ៍ស្ថានភាពស្ថិរភាពហិរញ្ញវត្ថុក្នុងឆ្នាំ២០២៣» នៅថ្ងៃទី២០ឧសភាថា សេដ្ឋកិច្ចកម្ពុជាបន្តងើបឡើង តាំងពីឆ្នាំ២០២៣ ក្នុងអត្រា៥ភាគរយ ជាមួយនឹងកំណើនក្នុងល្បឿនខុសគ្នាតាមវិស័យ ដែលធ្វើឱ្យអត្រាអតិផរណាបានថយចុះមកត្រឹម២,១ភាគរយ ស្របតាមនិន្នាការអតិផរណាក្នុងតំបន់ និងការធ្លាក់ថ្លៃប្រេងនៅលើទីផ្សារអន្តរជាតិ បើទោះបីស្ថានភាពសេដ្ឋកិច្ចក្នុងតំបន់ និងពិភពលោកត្រូវប្រឈមនឹងការកើនឡើងនៃអត្រាការប្រាក់ និងកម្រិតខ្ពស់នៃអត្រាអតិផរណាសកលក៏ដោយ។

លោកស្រីបណ្ឌិតបាន បន្តទៀតថា កំណើនសេដ្ឋកិច្ចកម្ពុជា ត្រូវបានគាំទ្រជាចម្បងដោយការនាំចេញផលិតផលកាត់ដេរ និងមិនមែនកាត់ដេរ ការបន្តងើបឡើងនៃវិស័យទេសចរណ៍និងវិស័យពាក់ព័ន្ធ និងកំណើនរឹងមាំនៃវិស័យដឹកជញ្ជូននិងទូរគមនាគមន៍ខណៈដែលវិស័យកសិកម្មអាចបន្តកើនឡើងយឺត។

លោកស្រីបណ្ឌិតថា៖« ការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីទ្វេភាគី (FTAs) ត្រូវបានរំពឹងថានឹងរួមចំណែក ទាក់ទាញលំហូរវិនិយោគនិងការនាំចេញទៅក្នុងតំបន់បន្ថែមទៀត ដែលនឹងជួយជំរុញផលិតភាពនិងការធ្វើពិពិធកម្មសេដ្ឋកិច្ច»។